Indonesia. Itorwa rya Nyampinga w'isi ryahagurukije abatsimbaraye ku matwara y'idini/Nkusi Joseph

Umutekano ukomeje gukazwa mu kirwa cya Bali aho bari bamaze iminsi bategura amarushanwa ya Nyampinga w'isi. Abatsimbaraye ku matwara ya Kiyisalamu bamaganye icyo gikorwa ndetse bavuga ko bazakora ibishoboka byose ngo kiburizwemo kuburyo byaje gutuma bakimura bakagikura mu murwa mukuru Jakarta bakakijyana kure mu kirwa cya Bali ariko naho abantu bakaba bafite impungenge z'iterabwoba rishobora kwibasira iki kirwa mu gihe ejo kuri 28/9/2013 bazaba bariho basoza aya marushanwa.

Abakobwa bambaye imyenda igera ku birenge bamaze iminsi mu myigaragambyo muri Indonesia bamagana iki gikorwa cyo gutora Nyampinga w'isi. Abigaragambya babona ko ibi ari urukozasoni ntaho bitandukaniye n'ubusambanyi n'uburaya. Mu ntangiriro z'uyu mwaka turimo, umutwe wa Islamic Defenders Front wagerageje gutera mu kirwa cya Bali, polisi ikinga ukuboko.

                                         Abigaragambya bitwaje ibyapa bivuga Allah 

Abantu bo mu Bwongereza bategura aya marushanwa, bakoze ibishoboka byose ngo aba batsimbaraye ku matwara y'idini bave ku izima ariko baranangira. Mu kugerageza gucobya umujinya wabo, hari gahunda bakuye mu irushanwa. Nk'imyenda yo kogana bayikuyemo, ubundi hakambarwa ibintu birebire ariko biba ibyo ubusa.

                                                        Uwigeze kuba nyampinga w'isi

Indonesia nicyo gihugu cy'abayisilamu gifite abaturage benshi cyane ku isi. Ku baturage barenga miliyoni 240 , bivugwa ko abarenga 90% ari abayisilamu. Abatsimbaraye ku matwara ya kiyisilamu barangajwe imbere n'umutwe wa Islamic Defenders Front, babona ibi bintu bigiye gukorerwa mu gihugu cyabo binyuranye n'amahame y'idini ryabo bityo uwizera wese akaba agomba kubirwanya.

Abahagarariye ibihugu by'Ubwongereza, USA na Austaraliya baburiye abaturage babo babasaba kuba maso mu gihe baje gusura iki gihugu muri iyi minsi. Ibi barabivuga bahereye kuri bombe yaturikijwe n'umutwe wa Jihad muri Indonesia muri 2012 maze ugahitana abantu basaga 200. Bakaba bafite impungenge ko ibi byasubira ku munsi w'ejo.

Uyu mutwe wa Islamic Defenders Front uherutse gushwiragiza Lady Gaga umubuza kuva mu ndege mu gihe yari aje kuririmba muri Indonesia. Wavuze ko naramuka avuye mu ndege akaza kuririmba, inzu ari bubikoreremo barayitwika nta kabuza. Icyo bamuhoraga si ikindi ngo ni uko yambara imyenda y'urukozasoni.

                                  

                                                                               Lady Gaga

Muri iri rushanwa hari abakobwa 129 bazaba bari mu ijonjora rya nyuma bavuye hirya no hino ku isi, hakaba hari abashinzwe umutekano w'aho ibi birori bizabera bagera kuri 700.

Nkusi Joseph

Shikama.fr

http://3.bp.blogspot.com/-NUn4w6tRzbY/UkVAln3GZ9I/AAAAAAAAmY4/tN3dGTJuSYc/s1600/1.png

Ifoto: Abagore bigaragambya